Joan den asteartean egindako Gobernu Kontseiluak EAEn lantokiak dituzten enpresa eta autonomoentzako dirulaguntzen deialdi berria onartu zuen, bizitza pertsonala, familia eta lana uztartzearen arloko diagnostikoak eta ekintza-planak egiteko. Deialdi honen helburua da enpresak sentsibilizatzea eta babestea, beren plantillen kontziliazio-beharrak identifika ditzaten eta neurri egokiak susta ditzaten, enpresa-sarearen produkzio-errealitateak eta -mugak ere kontuan hartuta.
Ekimen hori Ongizate, Gazteria eta Erronka Demografikoko Sailaren 2025-2028 Dirulaguntzen Plan Estrategikoaren barruan sartzen da, eta 420.000 euroko zuzkidura du guztira, 210.000 eurotik 2025erako eta beste 210.000 eurotik 2026rako. Diagnostikoa eta kontziliazio-plana garatzeko aholkularitza-zerbitzu espezializatuak kontratatu behar dituzten edozein tamainatako erakunde pribatuei zuzenduta daude laguntzak.
Izapideak erabat telematikoak izango dira, indarrean dagoen araudiak ezartzen duen bezala. Eskabideak Eusko Jaurlaritzaren egoitza elektronikoaren bidez aurkeztu beharko dira, eta bertan ere eskuragarri egongo dira beharrezko formularioak eta dokumentazio teknikoa.