Joan den urtarrilaren 8an, Baiona-Donostia Euskal Eurohiriaren batzarra egin zen Baionako Herriko Etxeko osoko bilkuren aretoan, eta Eider Mendoza Gipuzkoako Diputatu Nagusiak hartu zuen presidente kargua, Jean-René Etchegarayren ordez. Mendozak “urrats berriak, ausartak” emateko deia egin du, Bidasoaren bi aldeetako euskal erakundeen arteko lankidetzan sakonduz. Ahalegin horrek “komunitate, lurralde eta herrialde gisa indartzen gaitu, egungoa bezalako mundu ezegonkor batean”.
Eusko Jaurlaritzak proposatzen duen Makroeskualde Atlantikoaren sorreraren esparruan, Eurohiriaren eremuak “ikuspuntu askotatik funtsezko” eremua hartzen du, eta ildo horretan sortzen diren “aukerak aprobetxatzeko eta proiektu berriak lantzeko” prest agertu da. “Gure hizkuntzari, gizarteari eta nortasunari lotutako balioak partekatzen ditugu; era berean, ziurgabetasunez eta ezegonkortasunez betetako egungo mundu honetan, Bidasoak elkartutako euskal lurraldeak indartu nahi ditugu. Lankidetzan aukera berriak bilatzea, herritarren ongizatea indartzea. Horrekin batera, Europa aurreratu, demokratiko eta justu baten etorkizuna bermatzen laguntzen dugu “, adierazi du ahaldun nagusiak. Hala, mugaz gaindiko erakundeen arteko lankidetza bultzatzerakoan, Gipuzkoako Foru Aldundiak “lankidetzarako motor” izateko “erabakia” duela azpimarratu du, eta ahaldun nagusi gisa horretan inplikatuta jarraituko duela aurreratu du.