Ramiro González Arabako ahaldun nagusiak, Elixabete Etxanobe Bizkaiko ahaldun nagusiak eta Eider Mendoza Gipuzkoako ahaldun nagusiak adostutako neurriak aurkeztu zituzten hilaren 1ean. Neurri horien artean, zerga-zorrak atzeratzea, PFEZren ordainketa zatikatuetatik salbuestea, eskuratutako aktibo berrien gaineko ezohiko amortizazio bizkortua edo enplegua sortzeagatiko kenkari areagotua daude. Era berean, aldundiek konpromisoa hartu dute BEZaren itzulketen tramitazioa arintzeko, enpresei likidezia handiagoa emateko helburuarekin. Gipuzkoako Foru Aldundiak datorren astetik aurrera neurri hauek onartzea espero du.
Adostutako neurrien xehetasuna:
Zerga-zorren salbuespenezko geroratzea
Jarduera ekonomikoak egiten dituzten pertsona fisikoen eta mikroenpresen eta enpresa txikien zerga-zorrak geroratzea proposatzen da, bermerik eta berandutze-interesik sortu gabe, baldin eta horiek borondatezko epean aurkezteko eta ordaintzeko epea presako neurriak indarrean sartu eta hurrengo 3 hilabeteetan amaitzen bada. Adierazi behar da geroratze horiek ez dutela eraginik izango zergak modu arruntean aurkezteko kanpainen ondoriozko zerga-zorretan.
Zorrak 2 hilabetez geroratuko dira, borondatezko aitorpen- eta ordainketa-aldia amaitzen denetik aurrera. Epe horretatik aurrera, zenbateko bereko hileko 4 kuotatan zatituko dira.
PFEZaren ordainketa zatikatuetatik salbuestea
Jarduera ekonomikoak egiten dituzten pertsona fisikoek ez dute PFEZn zatikako ordainketarik egin beharrik izango, baldin eta borondatezko aldian aurkezteko eta sartzeko epea neurria indarrean sartzen denetik hurrengo hiru hilabeteetan amaitzen bada.
Ezohiko amortizazio azeleratua, eskuratutako aktibo berriei dagokienez
2026ko ekitaldian, amortizazio bizkorra (zenbateko arruntaren % 150) egiteko eskubidea aitortzen zaie sozietateen gaineko zergaren zergadunek eskuratzen dituzten aktibo berriei, eta, horrela, jarduera ekonomikoa suspertzeko behar dituzten inbertsioak egiten laguntzen zaie.
Kenkari areagotua enplegua sortzeagatik
2026ko ekitaldian, Sozietateen gaineko Zergan eta Pertsona Fisikoen Errentaren gaineko Zergan enplegua sortzeagatiko kenkariaren zenbatekoa handitu egin da enplegua sortzea errazteko jarduera ekonomikoak egiten dituzten zergadunentzat. Bai enplegu orokorra sortzeagatiko kenkariak, bai gazteak eta emakumeak kontratatzeagatiko kenkari espezifiko berriak % 10 egin dute gora.
BEZaren itzulketen izapidetzea bizkortzea
EAEko hiru foru aldundiek ere BEZaren itzulketen tramitazioa arintzeko konpromisoa hartu dute, epeak laburtuz, enpresei finantzaketa handiagoa emateko helburuarekin, aurreko krisietan egin den bezala.
Zenbatespenen arabera, neurri sorta horrek 282 milioiko likidezia injektatuko du epe laburrean Bizkaian, 103,5 milioikoa Araban eta 155 milioikoa Gipuzkoan. Beraz, neurri horiek 540,5 milioi euroko eragina dute EAE osoan.
Elektrizitatearen zerga-murrizketa:
Horrez gain, energia eta horren sorrera zergapetzen duten zergek (BEZa eta zerga bereziak) eragindako zerga-kargaren murrizketaren eragina gehitu behar zaio aurrez aipatutako guztiari. Murrizketa hori Kongresuan onartu zen 7/2026 Errege Lege Dekretuaren bidez, eta EAEn 2026ko martxoaren 22tik 2026ko ekainaren 30era aplikatu behar da, 232 milioiko eragin negatiboarekin foru-ogasunen bilketan.
Aldundi bakoitzak premiazko xedapen arauemailea onartuko du, neurri horiek apirilean bertan indarrean jar daitezen.