Laneko Segurtasun eta Osasunerako Europako Astearen harira joan den astelehenean aurkeztutako ekimenak laneko ongizatean eragiten duten arrisku psikosozialetan eta lan-baldintzetan jartzen du fokua, eta PrebenClick tresna interaktiboa estreinatzen du prebentzioa herritarrei hurbiltzeko.
“Badaude ikusten diren arriskuak, eta ikusten ez direnak?” kanpainak begi hutsez beti ikusten ez diren arriskuak nabarmendu nahi ditu, eta gogorarazi nahi du prebentzioak kontuan hartu behar dituela lan-osasunean eragina izan dezaketen faktore guztiak. Kanpaina horren bidez, Osalanek gogoeta kolektiboa bultzatu nahi du arrisku psikosozialak prebentzioaren kudeaketan erabat integratzearen garrantziari buruz, eta erakundeen erdigunean pertsonen osasuna eta ongizatea jarriko dituen prebentzioaren kulturarantz aurrera egitea. Arriskuak identifikatzea da arriskuak prebenitzeko eta lan-ingurune seguruagoak, osasungarriagoak eta jasangarriagoak eraikitzeko lehen urratsa.
Berrikuntza gisa, Osalanek PrebenClick aurkeztu du, herritar guztiei zuzendutako tresna interaktiboa. Arrisku psikosozialekin lotutako galderetan eta egoeretan oinarritutako jolasaren bidez, aplikazioak aukera emango du lan-ingurunean dauden hainbat errealitateri buruz hausnartzeko eta askotan oharkabean pasatzen diren arrisku-faktoreak identifikatzen ikasteko.